साउन-४

एजेन्सी-भियतनाममा गत साता परेको भारी वर्षासँगै आएको आकस्मिक बाढीपहिरोका कारण मृत्यु हुनेको संख्या पाँच पुगेको छ भने तीन जना अझै बेपत्ता रहेको विपद् तथा बाँध व्यवस्थापन प्राधिकरणले सोमबार जनाएको छ।

प्राधिकरणका अनुसार विपद्‌मा परी १० जना घाइते भएका छन्। हताहत हुने सबै व्यक्तिलाई चाउ प्रान्तका रहेका छन्।

गत बुधबारदेखि आइतबारसम्म परेको अविरल वर्षाका कारण उक्त क्षेत्रमा बाढीपहिरो गएको थियो। विपद्ले व्यापक भौतिक क्षति पुर्‍याएको छ।

प्रारम्भिक विवरणअनुसार ४२७ घर पूर्ण रूपमा ध्वस्त वा क्षतिग्रस्त भएका छन् भने उच्च जोखिमयुक्त क्षेत्रबाट करिब १४० परिवारलाई सुरक्षित स्थानमा सारिएको छ।

विपद्‌बाट भएको आर्थिक क्षति करिब ३६२ दशमलव ४६ अर्ब भियतनामी डङ (करिब एक करोड ४३ लाख अमेरिकी डलर) बराबर रहेको अनुमान गरिएको छ।